Կանադայի Հայ դատի հանձնախմբի ատենապետ Ժիրայր Բասմաջյանը, հանձնախմբի Օտտավայի գրասենյակի տնօրեն Ռուբեն Գույումջյանը և Կանադայի խորհրդարանի անդամ Ջիմ Գարիջիանիսը փետրվարի14-ին իր երկրի դիվանագետներին կոչ են արել հստակեցնել դիրքորոշումը Հայոց ցեղասպանության առնչությամբ: Մամուլի hետ հանդիպման պատճառ էր հանդիսացել սենատոր Նենսի Ռութի հակահայկական գործունեությունը: Վերջինս նամակ էր հղել Սենատի տնտեսության և բյուջեի հանձնաժողովի նախագահ Դեյվիդ Թաչուքին և կոչ արել կասեցնել Հայոց ցեղասպանության տարելիցի  ամենամյա հայտարարություններն` ընդգծելով, որ դրանք խոչընդոտ են հանդիսանում Կանադա-Թուրքիա հարաբերությունների զարգացման համար: Ռութը նամակում ընդգծել էր, թե այդ առաջադրանքն իրեն փոխանցել է  Անկարայում Կանադայի դեսպանը: Հայ դատի հանձնախմբի ներկայացուցիչները ԱԳՆ-ին կոչ են արել պարզել, թե արդյո՞ք կանադացի բոլոր դիվանագետներն են տեղյակ, որ իրենց երկիրը  2004թ. ճանաչել է Հայոց ցեղասպանությունը, իսկ անհրաժեշտության դեպքում «տեղյակ պահել» ցեղասպանության ժխտման դեմ պայքարելու Կանադայի դիրքորոշման մասին: