Այսօր առավոտյան, խորհրդարանական ընդդիմության առաջարկով, Ազգային ժողովում մեկնարկել են ամբողջությամբ համամասնական ընտրակարգի անցնելուն նվիրված  խորհրդարանական լսումներ, որին ներկա են եղել Հայաստանի քաղաքական դաշտի լայն սպեկտորի, այդ թվում` արտախորհրդարանական ընդդիմության ներկայացուցիչներ։ 100 տոկոսանոց համամասնական ընտրակարգի անցնելու առաջարկությամբ հանդես էին եկել ՀՅԴ-ն ու «Ժառանգությունը»:

Հիշեցնենք, որ ներկայում 131 պատգամավորներից 90-ն ընտրվում են համամասնական, 41-ը` մեծամասնական ընտրակարգերով:

ԱԺ նախագահ Սամվել Նիկոյանն առաջարկել է ստեղծել մի մարմին, որը կիրականացնի ընտրությունների անաչառ մոնիթորինգ, որում իշխանությունն ու ընդդիմությունը  կունենան հավասար ներկայացվածություն, այն նաեւ ԸՕ-ի նկատմամբ կիրականացնի որոշակի վերահսկողություն: Դաշնակցության ներկայացուցիչը նշել է, որ մեծամասնական ընտրակարգը միայն ծառայում է իշխանություններին, իսկ «Ժառանգությունը» կարծում է, որ հիմնական կեղծիքները կատարվում են մեծամասնականով, ու դա անում է մեծամասնականի թեկնածուն: Կառավարության ներկայացուցիչն ու Հանրապետականները համաձայնել են, որ միայն համամասնականի դեպքում ԱԺ-ում կհայտնվեն փոքր կազմ ունեցող կուսակցություններ, իսկ դա արդեն կխոչնդոտի կառավարության ձևավորմանը: ԲՀԿ-ն դեմ արտահայտվելով 100 տոկոս համամասնականի անցնելու գաղափարին` նշել է, որ այդ դեպքում ընտրող-պատգամավոր կապը կխզվի և ԱԺ-ում ներկայացված կլինեն պատգամավորներ` հիմնականում Երևանից։ ԲՀԿ-ն նաեւ առաջարկել է դիմել հանրությանն ու պարզել, թե ո՞ր ընտրակարգով է ժողովուրդը ցանկանում անցկացնել ընտրությունները: